Pregunta y contesta

Siguientemente e preguntanan mas haci (faq) pa mucha, mayornan, maestronan, organisacionan y otro intresadonan. Bo no ta mira bo pregunta? Tuma contacto cu nos of wak ariba nos pagina di Facebook of Instagram.

 

Pakiko e Buki di Pret ta existi?

Hopi mucha local no ta bay cu vakantie y e ora ey e vakantie grandi ta dura hopi largo. Afortunadamente tin asina hopi aktividadnan leuk pa haci na Aruba! Gustosamente nos ta yuda e mayornan y nan yiunan pa descubri esaki. E vakantie tambe ta un momento pa haya experiencianan nobo y nos ta gusta stimula muchanan pa nan descubri nan propio talentonan y pasionnan. Cada mucha na Aruba merece un vakantie leuk!

 

Ken ta ricibi e Buki di Pret?

Nos ta reparti e Buki na tur muchanan di scolnan basico na Aruba. Tambe e muchanan cu ta ricibi nan educacion na cas. E no ta pa turista of otro bishitante. Si bo no a haya bo Buki ainda, puntra na scol. Muchanan cu ta ricibi nan educacion na cas y cu no a haya un buki, por tuma contacto cu nos.

 

Mi por cumpra e Buki di Pret pa un amigo of un miembro di famia?

No, bo no por cumpra e Buki y e ta solamente gratis pa e muchanan di e scolnan basico cu ta biba na Aruba!

 

Con mi ta obtene e Buki di Pret?

Un par di siman prome cu vakantie grandi e Buki di Pret ta wordo reparti na scolnan basico di Aruba. Si un mucha tabata ausente, su buki a wordo duna na su maestro. Si ainda bo no tin bo buki, puntra pa esaki na scol. 

 

Pakiko mi mester reserva pa algun actividad?

E actividadnan hopi biaha tin un maximo na e cantidad di muchanan cu por participa. Pa bo evita decepcion, nos ta pidi pa bo reserva di antemano. Reservacion e aña aki por wordo haci for di diasabra 2 di juli 2022 8:00 am. Algun actividad bo por reserva via di e website aki.

 

E actividadnan ta pa tur mucha?

E Buki di Pret ta dirigi na tur e muchanan di scolnan basico, for di klas 1 te cu 6 y grupo 3 te cu 8. Pa algun actividad e proveedor a estabelece un limite di edad. E Buki di Pret a adopta e limite aki y esaki ta wordo indica claramente den e buki.

 

Pakiko e ta wordo yama Buki di Pret?

E titulo ta un combinacion: Buki ta Papiamento, Pret ta Hulandes. Nos ta sali for di e punto di bista cu e buki lo duna hopi pret ;-)

Con boso a jega na e ofertanan?

Nos a puntra na tur sorto di negoshi, asociacion y organisacion si nan kier a organiza un actividad leuk durante di vakantie grandi. Hopi organisacion a encanta pa haci esaki. 

 

Mi mayornan/ esnan cu ta cuidami, semper mester bay cumi?

Esaki ta depende di e actividad. Tin biaha ta obliga cu un acompañante adulto ta bay hunto cu bo. Si bo kier sa esaki sigur, tuma contacto cu e organisado di e actividad.

 

Mi a perde mi Buki di Pret. Mi por haya un nobo?

Lastimamente bukinan di reserva no a wordo traha. Pesei a wordo bisa durante di e partimento di e buki, pa bo skirbi bo nomber riba e buki mesora y pa warda e buki bon.

 

Durante ki periodo e Buki di Pret ta valido?

E ofertanan ta valido durante e vakantie grandi. Na 2022 esey ta di diasabra 9 di juli te cu 18 di augustus. E unico excepcion ta e torneo di schaak ariba diasabra 2 di juli y e Basketball clinic ariba diadomingo 21 di augustus.

 

Pa cada vakantie ta bin un buki cu ofertanan?

Nos no sa esaki ainda sigur. Mientras cu e organisacionan kier sigi traha y yudanos y si nos tin suficiente trahado voluntario pa haci esaki anualmente, e chens aki ta grandi. 

 

Cuanto edicion di e Buki di Pret a wordo imprimi?

Den 2022 un edicion di 9.000 buki a wordo imprimi. Cada negoshi cu ta participa tambe ta haya un buki. Alabes nos ta uza e bukinan tambe como material pa akiri mas negoshi y material di promocion pa e añanan binidero y nos kier warda algun den nos archief. 

 

Pakiko e Buki di Pret ta wordo imprimi na Hulanda?

Nos lo kier imprimi e buki na Aruba, pero pa tene e gastonan pagabel y ta sigur di esaki, e miho opcion tabata pa scoge un negoshi di imprenta Hulandes cu por a imprimi esaki lihe y bunita. Korps Mariniers a yuda nos enorme cu e transportacion di e bukinan for di Amsterdam pa Aruba.

 

Mi ta un empresario y mi tambe kier aparece den e Buki di Pret.

Leuk! Naturalmente bo ta bon bini pa join nos den e siguiente edicion. Tuma contacto cu nos. 

 

Mi por pone advertencia den e Buki di Pret?

Den e edicio di 2022 solamente un advertencia di telefon pa mucha a wordo poni. Esaki ta un excepcion. En principio nos no ta tuma advertencia. Segun palabracion nos por fiha si ta deseabel pa den e edicionnan benidero nos si lo tuma advertencianan. Tuma contacto cu nos.

 

Mi tambe kier bira un sponsor di e Buki di Pret. Esaki ta posibel?

Ta bon pa sa cu bo ta sostene e Buki di Pret. Tin dos tipo di sponsor: oficial y informal.

Tur hende cu kier recomenda e Buki di Pret y cu ta desea lo miho pa e muchanan di Aruba, nos ta mira como embahador di e bon causa. Bo kier bira un sponsor oficial, e ora ey tuma contacto cu nos.